PORTAL DAS PALABRAS
Palabra do Ano 2023
XA SE PODE VOTAR !
PODES VOTAR ATA O LUNS 25 DE DECEMBRO ÁS 23:59 HORAS EN:
https://portaldaspalabras.gal/palabradoano/
CIBERCARRACHO, -A
Outra maneira de lle chamar ao ciberdelicuente. Este neoloxismo tira do humor a partir do parecido entre quen nos rouba datos, ou directamente cartos, e ese becho case invisible que nos chucha o sangue.
COOFICIALIDADE
Este ano o Congreso dos Deputados deu un paso importante no camiño cara á igualdade de trato do galego e as demais linguas cooficiais. Sigamos avanzando en todos os niveis!
EDUCACIÓN EMOCIONAL
Non importan só as materias que fan media. A xestión das emocións emerxe por fin como unha parte fundamental da educación para mellorar as relacións interpersoais e o benestar propio.
FEITIÑO, -A
Adoramos as persoas ás que lles podemos asignar este adxectivo que destaca tanto virtudes morais como físicas. Fan mellor as nosas vidas e de toda a comunidade. Por iso, aínda que marchen para sempre, nunca as esqueceremos.
DEREITOS HUMANOS
No 75 aniversario da Carta Universal dos Dereitos Humanos, berramos este sintagma nominal para denunciarmos a constante violación do contido deste texto. Na súa defensa radica a nosa verdadeira humanidade.
BIODIVERSIDADE
Esta voz evoca neste 2023 dende as mobilizacións dos últimos meses contra o impacto ambiental e social de grandes proxectos eólicos en Galicia ata o gran desafío mundial do cambio climático.
Comentarios
Publicar un comentario